8Siz (Quran barəsində) müxtəlif sözlər deyirsiniz.
9(Qurandan) dönən kimsə ondan döndərilər.
10Qəhr olsun yalançılar!
11O kəslər ki, cəhalət içində qalmış qafillərdir.
12Onlar haqq-hesab gününün nə vaxt olacağını soruşurlar.
13O gün onlara cəhənnəmdə əzab veriləcəkdir.
14(Onlara belə deyiləcək:) “Dadın əzabınızı! Bu, tezliklə gəlməsini istədiyiniz şeydir”.
15Şübhəsiz, müttəqilər cənnətlərdə və çeşmə başlarında olacaqlar.
16Rəbbinin onlara verdiyini (mükafatlarını) alacaqlar. Çünki onlar bundan əvvəl yaxşı əməl sahibləri idilər.
17Onlar gecələr (ibadət edib) çox az yatırdılar.
18Sübh çağında isə istiğfar edirdilər.
19Mallarında da dilənçinin və yoxsulun haqqı (payı) var idi.
20Yer üzündə yəqinliklə inananlar üçün (Allahın varlığını və qüdrətini göstərən) dəlillər vardır.
21Sizin özünüzdə də (buna dair dəlillər vardır)! Hələ də görmürsünüzmü?
22Göydə də ruziniz (yağış) və sizə vəd olunan (mükafat və ya cəzalar) vardır.
23Göyün və yerin Rəbbinə and olsun ki, bu vəd sizin danışığınız kimi gerçəkdir.
24(Ey Peyğəmbər!) İbrahimin hörmətli qonaqlarının xəbəri sənə gəlib çatdımı? (Bu qonaqlar Allah tərəfindən göndərilmiş və insan surətinə girmiş mələklər idi.)
25Onlar İbrahimin hüzuruna daxil olub salam verdiklərində o da: “Salam! Siz yad adamlarsınız”, - dedi.
26İbrahim dərhal ailəsinin yanına getdi və kök bir buzov (qızardıb) gətirdi.
27Yeməyi onlara yaxınlaşdırıb: “Yemirsinizmi?” - dedi.
28İbrahim (qonaqların yemədiklərini görüb) dərhal onlardan qorxuya düşdü. Onlar: “Qorxma!” - dedilər və onu çox bilikli bir oğlan uşağı (İshaq) ilə müjdələdilər.
29Onun zövcəsi (Sara) qışqıraraq gəldi və əlini üzünə vuraraq: “Mən sonsuz bir qoca qarıyam!” - dedi.
30Onlar: “Rəbbin belə buyurdu. Şübhəsiz ki, O, hikmət sahibidir, hər şeyi biləndir!” - dedilər.
31İbrahim dedi: “Elə isə sizin (mənimlə) nə işiniz var ey elçilər?”
32Onlar dedilər: “Biz günahkar bir qövmə göndərilmişik ki,
33Onların üstünə gildən daşlar yağdıraq.
34Bu daşlar həddi aşanlar üçün Rəbbinin dərgahında işarələnmişdir.
35Oradakı möminləri də (oradan) çıxartdıq.
36Orada bir evdən (bir ailədən) başqa müsəlman tapmadıq.
37Şiddətli əzabdan qorxanlar üçün orada (ibrətamiz) bir işarə saxladıq.
38Musanın da (hekayətində ibrətlər vardır)! Bir zaman onu açıq-aşkar bir dəlillə Fironun yanına göndərmişdik.
39O (Firon), öz ordusu ilə birlikdə (haqdan) üz çevirib: “Bu sehrbazdır, yaxud dəlidir!” – demişdi.
40Nəhayət, Fironu və əsgərlərini yaxaladıq və onları dənizə atdıq. O, (boğularkən, iman gətirmədiyi üçün) öz-özünü qınayırdı.
41Ad qövmündə də (ibrətlər vardır)! O zaman onların üstünə faydasız (məhv edən) bir külək göndərmişdik.
42O külək üstündən keçdiyi hər şeyi külə çevirirdi.
43Səmud qövmündə də (ibrətlər vardır)! O zaman onlara: “Müəyyən bir vaxta qədər (dünya nemətlərindən) faydalanın!” - deyilmişdi.
44Onlar Rəbbinin əmrinə qarşı çıxdılar və buna görə də onlar görə-görə (gündüz) özlərini ildırım vurmuşdu.
45Beləliklə, onlar ayağa qalxa bilmədilər, onlara yardım edən də olmadı.
46Daha əvvəl Nuh qövmünü də (məhv etmişdik). Çünki onlar fasiq bir qövm idilər.
47Biz göyü əllərimizlə (qüdrətimizlə) yaratdıq və onu genişləndiririk. (Bəzi müasir təfsirçilər bu ayədəki “Biz onu genişləndiririk” ifadəsinin kainatdakı planetlərin və qalaktikaların getdikcə bir-birindən uzaqlaşmasına işarə etdiyini bildirmişlər.)
48Biz yeri də döşədik. Biz necə də gözəl döşəyirik!
49Düşünüb ibrət alasınız deyə hər şeydən cüt-cüt yaratdıq.
50(De:) “Allaha tərəf qaçın (yönəlin)! Həqiqətən, mən Onun tərəfindən sizə göndərilmiş açıq-aşkar xəbərdarlıq edən bir peyğəmbərəm.
51Allahla yanaşı başqa bir ilah qəbul etməyin! Həqiqətən, mən Onun tərəfindən sizə göndərilmiş açıq-aşkar xəbərdarlıq edən bir peyğəmbərəm”.
52Onlardan əvvəlkilərə də bir peyğəmbər gəldiyi zaman məhz belə demişdilər: “Bu sehrbazdır, yaxud divanədir!”
53Bunu (nəsildən-nəsilə) bir-birinə vəsiyyətmi etmişdilər?! Xeyr! Onlar azğın bir qövmdür.
54Artıq onlardan üz çevir! Sən bundan ötrü qınanmayacaqsan.
55Sən öyüd-nəsihət ver! Çünki öyüd-nəsihət möminlərə fayda verər.
56Cinləri və insanları yalnız Mənə ibadət etsinlər deyə yaratdım.
57Mən onlardan nə bir ruzi, nə də Məni yedirtmələrini istəyirəm.
58Şübhəsiz ki, ruzi verən, qüvvət sahibi və mətin olan Allahdır!
59Həqiqətən, zülm edənləri də (keçmiş) yoldaşları kimi əzab qisməti gözləyir. Buna görə də onlar Məni tələsdirməsinlər.
60Onlara vəd olunan günlərinə görə vay kafirlərin halına!
