- ﷽
1Rəhman (mərhəmətli Allah)!
2Quranı öyrətdi.
3İnsanı yaratdı.
4Ona danışmağı öyrətdi.
5Günəş və ay müəyyən bir ölçüyə görə hərəkət edir.
6Bitkilər də, ağaclar da Allaha səcdə edir.
7O, göyü ucaltdı və mizanı (tərəzini) qoydu ki,
8Tərəzidə həddi aşmayasınız.
9Tərəzidə ədalətə riayət edin və çəkini əskiltməyin!
10O, yer üzünü canlılar üçün yaratdı.
11Orada meyvələr və salxımlı xurma ağacları var.
12Saçaqlı dənli və xoş ətirli bitkilər var.
13Elə isə Rəbbinizin hansı nemətlərini inkar edə bilərsiniz?!
14O, insanı saxsı kimi quru palçıqdan yaratdı.
15Cinləri də tüstüsüz oddan yaratdı.
16Elə isə Rəbbinizin hansı nemətlərini inkar edə bilərsiniz?!
17O, iki məşriqin də, iki məğribin də Rəbbidir.
18Elə isə Rəbbinizin hansı nemətlərini inkar edə bilərsiniz?!
19O, yan-yana duran iki dəniz meydana gətirdi.
20Onların arasında maneə var və buna görə də bir-birinə qarışmazlar.
21Elə isə Rəbbinizin hansı nemətlərini inkar edə bilərsiniz?!
22Hər ikisindən də inci və mərcan çıxar.
23Elə isə Rəbbinizin hansı nemətlərini inkar edə bilərsiniz?!
24Dənizdə uca dağlar kimi üzən gəmilər də Onundur.
25Elə isə Rəbbinizin hansı nemətlərini inkar edə bilərsiniz?!
26Yer üzündəki hər kəs fanidir.
27Əzəmətli və kərəm sahibi Rəbbinin zatı isə əbədidir.
28Elə isə Rəbbinizin hansı nemətlərini inkar edə bilərsiniz?!
29Göylərdə və yerdə kim varsa, hamısı Ondan istəyər. O hər gün (hər an) bir işdədir.
30Elə isə Rəbbinizin hansı nemətlərini inkar edə bilərsiniz?!
31Ey ağır yükü olan (insan və cin tayfası)! Sizə də (haqq-hesab üçün) vaxt ayıracağıq.
32Elə isə Rəbbinizin hansı nemətlərini inkar edə bilərsiniz?!
33Ey cin və insan tayfası! Əgər göylərin və yerin hüdudlarını keçib getməyə gücünüz çatırsa, keçin! Qüdrətiniz olmadan əsla keçə bilməzsiniz.
34Elə isə Rəbbinizin hansı nemətlərini inkar edə bilərsiniz?!
35Sizin üstünüzə oddan bir alov və tüstü göndərilər və siz bir-birinizə kömək də edə bilməzsiniz.
36Elə isə Rəbbinizin hansı nemətlərini inkar edə bilərsiniz?!
37Göy yarılıb qızarmış yağ kimi qıpqırmızı olduğu zaman...
38Elə isə Rəbbinizin hansı nemətlərini inkar edə bilərsiniz?!
39O gün insana da, cinə də günahı soruşulmaz.
40Elə isə Rəbbinizin hansı nemətlərini inkar edə bilərsiniz?!
41Günahkarlar simalarından tanınar, kəkillərindən və ayaqlarından yaxalanarlar.
42Elə isə Rəbbinizin hansı nemətlərini inkar edə bilərsiniz?!
43Bu, günahkarların yalanladıqları cəhənnəm odudur!
44Onlar odla qaynar su arasında dolaşıb durarlar.
45Elə isə Rəbbinizin hansı nemətlərini inkar edə bilərsiniz?!
46Rəbbinin hüzurundan (Ona hesab verməkdən) qorxanlar üçün iki cənnət vardır.
47Elə isə Rəbbinizin hansı nemətlərini inkar edə bilərsiniz?!
48Hər ikisində də növbənöv ağaclar vardır.
49Elə isə Rəbbinizin hansı nemətlərini inkar edə bilərsiniz?!
50İkisində də iki axar bulaq vardır.
51Elə isə Rəbbinizin hansı nemətlərini inkar edə bilərsiniz?!
52İkisində də hər meyvədən iki növ vardır.
53Elə isə Rəbbinizin hansı nemətlərini inkar edə bilərsiniz?!
54(Cənnət əhli) astarları atlazdan olan döşəklərə söykənəcəklər. Hər iki cənnətin meyvələri (dərə bilmələri üçün onlara) yaxın olacaqdır.
55Elə isə Rəbbinizin hansı nemətlərini inkar edə bilərsiniz?!
56Orada gözləri ərlərindən başqasını görməyən qızlar vardır. Bundan əvvəl onlara nə bir insan, nə də bir cin toxunmuşdur.
57Elə isə Rəbbinizin hansı nemətlərini inkar edə bilərsiniz?!
58Onlar sanki yaqut və mərcandırlar.
59Elə isə Rəbbinizin hansı nemətlərini inkar edə bilərsiniz?!
60Yaxşılığın əvəzi ancaq yaxşılıqdır!
61Elə isə Rəbbinizin hansı nemətlərini inkar edə bilərsiniz?!
62O ikisindən əlavə iki cənnət də vardır.
63Elə isə Rəbbinizin hansı nemətlərini inkar edə bilərsiniz?!
64Hər ikisi yamyaşıldır.
65Elə isə Rəbbinizin hansı nemətlərini inkar edə bilərsiniz?!
66O ikisində fışqıran iki bulaq vardır.
67Elə isə Rəbbinizin hansı nemətlərini inkar edə bilərsiniz?!
68İkisində də hər cür meyvə, xurma və nar vardır.
69Elə isə Rəbbinizin hansı nemətlərini inkar edə bilərsiniz?!
70Orada xoşxasiyyətli və gözəl simalı qadınlar vardır.
71Elə isə Rəbbinizin hansı nemətlərini inkar edə bilərsiniz?!
72Çadırlarda gözləri ərlərindən başqasını görməyən hurilər vardır.
73Elə isə Rəbbinizin hansı nemətlərini inkar edə bilərsiniz?!
74Onlara bundan əvvəl nə bir insan, nə də bir cin toxunmuşdur.
75Elə isə Rəbbinizin hansı nemətlərini inkar edə bilərsiniz?!
76(Cənnət əhli) yaşıl mütəkkələrə və gözəl naxışlı döşəkcələrə söykənəcəklər.
77Elə isə Rəbbinizin hansı nemətlərini inkar edə bilərsiniz?!
78Əzəmət və kərəm sahibi olan Rəbbinin adı çox ucadır!