- ﷽
1Qiyamət qopduğu zaman!
2Onun qopacağını heç kim inkar edə bilməz.
3O, kimini alçaldar, kimini də ucaldar.
4Yer şiddətlə sarsıldığı zaman,
5Dağlar parçalanıb ovxalanaraq -
6Səpələnmiş toz kimi olduğu zaman,
7Siz üç firqəyə ayrılacaqsınız.
8Sağ tərəfdəkilər! Nə xoşbəxtdir sağ tərəfdəkilər!
9Sol tərəfdəkilər! Nə bədbəxtdir sol tərəfdəkilər!
10(Yaxşı əməldə) öndə olanlar (mükafatda da) öndədirlər!
11Onlar Allaha yaxın kimsələrdir.
12Nəim cənnətlərində!
13Onların çoxu əvvəlkilərdəndir.
14Bir qismi də sonrakılardandır.
15Onlar bəzədilmiş taxtlarda əyləşəcəklər.
16Taxtların üstündə qarşı-qarşıya əyləşib söykənəcəklər.
17Onların ətrafında həmişəcavan (xidmətçi) gənclər dolanacaqlar.
18Şərab bulağından doldurulmuş badələr, kuzələr və qədəhlərlə!
19Ondan nə başları ağrıyar, nə də ağılları gedər.
20(Onlar üçün) bəyəndikləri meyvələr,
21Arzuladıqları quş əti,
22Və irigözlü hurilər vardır.
23Onlar qorunub saxlanan inci kimidirlər.
24Bu, onlara etdikləri əməllərin mükafatı olaraq veriləcəkdir.
25Onlar orada nə boş bir söz, nə də günaha aparan bir şey eşidəcəklər -
26“Salam! Salam!” sözlərindən başqa.
27Sağ tərəfdəkilər! Nə xoşbəxtdir sağ tərəfdəkilər!
28Onlar tikansız sidr ağacları arasında,
29(Meyvələri) salxım-salxım sallanmış banan ağacları arasında,
30Uzanmış kölgələr altında,
31Daim axan suyun kənarında,
32Çoxlu meyvələr arasında olacaqlar.
33O məyvələr nə tükənər, nə də qadağan olunar.
34Onlar hündür döşəklərdə oturacaqlar.
35Həqiqətən, Biz qadınları yenidən başqa bir gözəllikdə yaradacağıq.
36Biz onları bakirə qızlar edəcəyik -
37Ərlərini sevən həmyaşıd qızlar.
38Onlar sağ tərəfdəkilər üçündür.
39Onların bir qismi əvvəlkilərdən,
40Bir qismi də sonrakılardandır.
41Sol tərəfdəkilər! Nə bədbəxtdir sol tərəfdəkilər!
42Onlar qızmar yel və qaynar su içində,
43Qapqara tüstü kölgəsi altında olacaqlar.
44O nə sərin, nə də xoşagələndir.
45Onlar bundan əvvəl bolluq içində idilər.
46Onlar böyük günah işləməkdə israr edirdilər.
47Onlar belə deyirdilər: “Biz ölüb torpaq və sür-sümük olduqdan sonra təkrar dirildiləcəyik?
48Əvvəlki atalarımız da?”
49De: “Heç şübhəsiz, əvvəlkilər də, sonrakılar da,
50Məlum bir günün (axirət gününün) müəyyən vaxtında toplanacaqlar.
51Sonra siz, ey haqq yoldan azanlar, haqqı yalanlayanlar!
52Şübhəsiz ki, zəqqum ağacından yeyəcəksiniz.
53Qarınlarınızı onunla dolduracaqsınız.
54Onun üstündən də qaynar su içəcəksiniz.
55Həm də susamış dəvələrin içdiyi kimi içəcəksiniz.
56Bu onların haqq-hesab günündəki ziyafətidir.
57Sizi Biz yaratdıq. (Elə isə təkrar dirilməni) təsdiqləməli deyilsinizmi?
58Elə isə deyin görək, (ana rəhminə) atdığınız nədir?
59Onu siz yaradırsınız, yoxsa Biz?!
60Sizin aranızda ölümü də Biz müəyyənləşdirdik. Heç kim Bizə mane ola bilməz -
61Sizin yerinizə bənzərlərinizi gətirməkdə və sizi bilmədiyiniz bir şəkildə yenidən yaratmaqda!
62Şübhəsiz ki, siz ilk yaradılışı bilirsiniz. Elə isə düşünüb ibrət almalı deyilsinizmi?
63Bəs əkdikləriniz barədə nə deyirsiniz?
64Onu siz bitirirsiniz, yoxsa Biz?
65Əgər Biz istəsəydik, əlbəttə, onu bir saman çöpünə çevirərdik. Siz də təəccüb içində qalıb:
66“Həqiqətən, biz ziyana uğramışıq.
67Daha doğrusu biz (ruzimizdən) məhrum qalmışıq”, - (deyərdiniz).
68Bəs içdiyiniz su barədə nə deyirsiniz?
69Onu buluddan siz endirirsiniz, yoxsa Biz?
70Əgər Biz istəsəydik, onu duzlu edərdik. Bunun üçün şükür etməli deyilsinizmi?!
71Bəs yandırdığınız od barədə nə deyirsiniz?
72Onun ağacını siz yaradırsınız, yoxsa Biz?
73Biz onu ibrət olsun və yolçular istifadə etsin deyə yaratdıq.
74Ona görə də uca Rəbbinin adını təsbeh et!
75Ulduzların doğub-batdığı yerlərə and içirəm!
76Kaş bunun böyük bir and olduğunu biləydiniz.
77O, həqiqətən, dəyərli Qurandır.
78Qorunmuş bir Kitabdadır (Lövhi-məhfuzdadır).
79Pak olanlardan (mələklərdən) başqası ona toxuna bilməz.
80O (Quran), aləmlərin Rəbbi tərəfindən nazil edilmişdir.
81İndi siz bu sözümü yalanlayırsınız?!
82Sizə verilən ruzini təkzib edərəkmi şükür edirsiniz?!
83Can boğaza çatdığı zaman -
84O an siz (can verən adama) baxıb qalırsınız.
85Biz ona sizdən daha yaxınıq, lakin siz görmürsünüz.
86Əgər (öldükdən sonra) haqq-hesaba çəkiləsi deyilsinizsə,
87Və doğru deyirsinizsə, onu (o canı) geri gətirin!
88Ancaq (ölən insan) Allaha yaxın olanlardandırsa,
89Onun üçün rahatlıq, gözəl ruzi və Nəim cənnəti vardır.
90Əgər sağ tərəfdəkilərdəndirsə,
91(Ona belə deyilər:) “Sağ tərəfdəkilərdən sənə salam olsun!”
92Əgər haqqı yalanlayıb doğru yoldan azanlardandırsa,
93Onun üçün qaynar su ziyafəti olacaqdır.
94O, cəhənnəmə atılacaqdır.
95Şübhəsiz ki, bu, danılmaz həqiqətdir.
96Elə isə uca Rəbbinin adını təsbeh et!