﷽1Ən uca olan Rəbbinin adını təsbeh et!
2O, hər şeyi yaradıb nizama saldı.
3O, hər şeyin miqdarını təyin etdi və doğru yolu göstərdi.
4O, (torpaqdan) otlağı çıxartdı.
5Sonra da onu qaralmış quru bir samana çevirdi.
6Biz sənə Quranı oxudacağıq və o sənin yadından çıxmayacaq.
7Allahın istədiyi bundan istisnadır! Şübhəsiz ki, O, aşkar olanı da, gizli olanı da bilir.
8Biz sənə ən asan olanı (İslam dinini) müyəssər edəcəyik.
9Əgər öyüd vermək fayda verirsə, sən öyüd-nəsihət ver!
10Allahdan qorxan nəsihəti qəbul edəcəkdir.
11Bədbəxt (kafir) isə ondan uzaq duracaqdır.
12O, ən böyük oda girəcəkdir.
13Sonra orada nə öləcək, nə də yaşayacaqdır.
14Günahlardan təmizlənən qurtulacaqdır.
15(O kəs ki,) Rəbbinin adını zikr edən və namaz qılar.
16Ancaq siz dünya həyatını üstün tutursunuz.
17Halbuki axirət daha xeyirli və daha əbədidir.
18Həqiqətən, bunlar əvvəlki kitablarda da mövcuddur
19İbrahimin və Musanın səhifələrində.
